كسار الزبادي لقمان ديركي

تشكيك بتشخيصك
يا جماعة في قصة مخولتلي راسي و مشككتني بقدراتي العقلية يعني هالزهرة بنته لأبو خاطر شو هالوجع اللي فيها يعني؟! عم يسلبوها علينا كل جزء فيها علة، يعني الله يعين هالصهر بشو انبلى، بالجزء الثاني كانت خرسة و طرشة خلقة الله، و على أساس حطوا لها بدل الجرس ضو مشان إذا حدا إجا لعندها تحس عليه، وإذا .


بها صارت تسمع بالجزء الثالث و طلعوا مخربطين بالتشخيص يعني طلع السبب حمى، و بعدين نطقت من شدة الطلق، يمكن الحكيم أبو عصام الحكيم هو السبب، هو اللي كان مخربط بالتشخيص في الأجزاء السابقة، و لما موَّتوه غيروا الحالة مشان يطلعوه مخربط بالتشخيص، وينك يا أبو عصام لتشوف شو صار بأمراض الحارة بغيابك..
غزل جعمور

16يوماً

سقاق العدالة
الرائد هشام : مساعد جميل خود دورية وداهم الموقع وألقي القبض على المشتبه فيه.
المساعد جميل : حاضر سيدي .
عنصر أمن : هادا هو سيدي كمشته.
المساعد جميل : برافو عليك يا ابني ..... شو أبو عصام شايفك متنكر بشخصية أبو جعفر المنصور ... بس وين بدك تهرب....
(أبو عصام المتنكر بزي أبو جعفر يصرخ قائلاً)
أبو عصام : الله وكيلك ياسيدي مو أنا ...أنا مادخلني... هادا سيدي لقمان ديركي هي أفكاره ياسيدي.
المساعد جميل : اشحطه عالفرع وهنيك منعرف حسابنا معك يا أبو عصام المنصور.
(في الفرع)..
الرائد هشام : هات لنشوف اعترف..
أبو عصام : له يا عكيد انا أبو عصام..
(العقيد الرائد هشام ينادي المساعد جميل)..
أبو عصام : لا يا سيدي كل شي إلا المساعد جميل رح احكيلك كل شي... هادا ياسيدي بعد ماطلعوني من باب الحارة وكترت القصص والحكايا كنت قاعد بالبيت مكتئب و اذ بيندق الباب..
صوت خارجي : أنا لقمان افتح..
(أبو عصام يفتح الباب)..
لقمان : شبك يازلمة شبك حابس حالك وقاعد..
أبو عصام : والله يالقمان وجعني راسي من كتر البلبلة بالاضافة كتير مقروق من طلعتي من باب الحارة
لقمان : بسيطة ولايهمك محلولة..
أبو عصام : ايدي بزنارك بحياتي مارح انسى معروفك..
لقمان : بس هي هيه انسى... انساك... لن ننساك..
أبو عصام : شو؟!..
لقمان : ايه لن ننساك رح خصصلك زاوية يومية اسمها لن ننساك لمناصرتك ومناشدتك للعودة لباب الحارة بس بدي اك تختفي شوي عن العين...
أبو عصام : ليش بقى؟!..
لقمان : حتى تصير الشوشرة أكبر ... شو رأيك تتقمص شخصية أبو جعفر المنصور..
أبو عصام : بس أنا عم فكر..
يتبع..
ماهر

16 يوما

تفنكات
مرحبا لقمان
شاهدنا الحكيم عم يفحص أبو ابراهيم و يقيس ضغطه وهنا سؤال يطرح نفسه هل في ذلك الوقت كان في جهاز قياس ضغط للدم؟! والحمد لله ما رح نشوف غرفة انعاش في الحلقات القادمة هههههه بس ممكن تحصوا كم ممثل مات من بداية المسلسل الى الآن؟...
أحمد بللو

16يوما

البقاء لله
الله يرحمك يا أبو ابراهيم , شايف ابو عصام كل عناصر المسلسل عم يشتاقوا لك، نص المسلسل مات ورح يموت بأذن الله، رح يصير فاجعة ومايضل الا الكاتب والمخرج عم يمثلوا لوحدهم، الكانب بدل أبو بدر والمخرج بدل بياع البليلة لأنو الاتنين مولازمين بالمسلسل .. الله يرحمك يا أبو عصام، الدور جاي ع الكاميرات واجهزة الصوت كله تضامناً معك يا ابو عصام..
شادي أحمد محملجي

16يوما

خطأ مطبعي
الله يرحمه ابو ابراهيم.. حسب تحقيق الرائد العقيد هشام طلع ابو ابراهيم معو الايدز!! مو الحكيم اجى لعنده واعطاه ابرة.. طلعت مو معقمة منيح!!.. كان لازم يروح ع المصح تبع الخط السيرقوني..
احمد ابراهيم

16يوما

سيناريوهات محتملة لمسلسلات قادمة
بطولة ابو عصام
مغامرات ابو عصام : مسلسل يسلط الضوء على القرارات الهامة و المصيرية التي اصدرها ابو عصام في الجزئين 1 و 2 من مسلسل باب الحارة..
بداية ابو عصام : يبدأ المسلسل من مولد ابو عصام و يصور ذكائه و فطنته ما دفع والده للتفكير بان ابو عصام سيكون حكيم غير شكل ثم يمر المسلسل بزواج ابو عصام و انجابه الأطفال وينتهي بمشهد استشهاد البطل ابو عصام في الغوطة..
ابو عصام 2008 : مسلسل ناقد للوضع الحالي قليل الأدب و الحشمة فنرى موقف ابو عصام من احداث العام 2008 و ينتهي المسلسل بموت ابو عصام مجلوطاً الله يرحمه..
بطولات ابو عصام : مسلسل مخصص للمعارك الشرسة التي خاضها البطل ابو عصام تبدأ من النقيفة الى الشبرية و توابعها و انتهاء بالأسلحة النارية..
ابو عصام والإدعشري : مسلسل يناقش شغلة معينة من وجهة نظر ابو عصام ثم من وجهة نظر الإدعشري..
ابو عصام جونيور

16يوما

باب الحارة الحلبية
أبو عصام الملك لن ننساك..
لن ننساك وفي قلوبنا دمعة على موتك..
لن ننساك وفي قلوبنا لوعة..
لن ننساك انت وهالصلعة..
لن ننساك أنت ومرتك سعاد المتفرعة..
عمر ملحيس

16يوما

ليل الحارة
يبدو ان استبعاد ابوعصام كان أول الغيث..ويبدو ان مشاكل المؤلف والمخرج مع الممثلين تزداد يوما بعد يوم
فبعد فجيعتنا باستشهاد ابوعصام رحمه الله..لحقت به ام خاطر بشكل مفاجئ اثر سقوطها من السلم.. وكان ثالث المستبعدين هو ابو ابراهيم..وقد توقعت انه سيستبعد من المسلسل منذ أن التحش بالفرشة خلال الايام الماضية ولاندري من سيلحق بهم من العضوات..ونسأل أنفسنا: هل سيبقى أحد للجزء الرابع؟؟؟.. ام أن الجزء الرابع سيتم تصويره في المقبرة مع ابوعصام والادعشري والزعيم وابو سمير الحمصاني وكل المرحومين؟.. ربما.. وبالمرة بيصيروا مسلسلين بمسلسل واحد (باب الحارة جزء رابع + ليل ورجال جزء تاني)..
أمير بلاش

16يوما

قصيد
تربشت بالحاراة ربشة متكلمشة في عين الغفــــا
سفـحت تراشقاً من دلهمٍ وكاد من بعدها أو شفــــا
أبـــا عصامٍ وأمواسكم تحاشي مبللاتِ الذقونِِِِِ قد لفى
نــامت أعينهم عن رمدٍ والضبعُ تدكّنَ في عـين الهفا
شرح المفردات :
الحارة : شارع فرعي من أهم معالمة الساحة الوارفة (نعم وارفة لضرورة شرح المفردات ) وله باب وله أجزاء من واحد لى ثلاثة..
أبا عصام : حلاق مثالي عاش أوائل القرن العشرين أيام الانتداب الفرنسي إمتاز على أقرانه بالحكمة الأخلاقية والطبية معاً يعتبر أول من ركب كاتم صوت للببور عانى من ظلم ذوي القربى وتم إبعاده قسراً عن دكانه التي كان ينام فيها قرير العين هنيا ، تبنت صفحة كسار الزبادي قضيته العادلة وسعت لاستصدار قرار من مجلس الأمن تحت البند السابع لإعادته إلى حارته (القضية مازالت تحت البحث حتى يومنا هذا)..
الضبع : حيوان غير أليف يربى في المسلسلات الريفية والبيئية عادةً يمتلك حارة شهيرة جداً لها عكيد من حملة الشوارب الطويلة..
سامر كاسوحة

16يوما

شهر تحميص
كلنا منعرف إنو خلص الجزء التاني من باب الحارة و لطفية كنة أبو عصام حامل بالشهر السادس و بعدين بلش الجزء التالت من المسلسل و لساتها لطفية المسكينة مطلقة و بطنها لحلقها الله يعينها ,و لما توفي أبو عصام بأول حلقة ( ألف رحمة ونور تنزل عليه ) قعدت أم عصام بالعدة أربعة اشهر و عشرة أيام و قعد معها بالعدة كل نسوان الحارة لأنه حزن بيت من أهل الحارة هو حزن كل بيوت أهل الحارة , يا هيك الأصول يا بلا . بس اللي ما بتعرفوه أنه وصل الحزن لعند سعاد الصغيرة اللي لساتها في بطن أمها , وتضامناً منها مع سعاد الكبيرة حلفت يامين انو ما تنزل على هي الدنيا و لا تشوف عيونها الضو قبل ما تخلص ستها العدة مشان تحضر ولادتها . وهيك اضطرت لطفية آسفة انو تضل حامل عشرة اشهر بدل تسعة متل كل الحوامل، قام اجت سعاد الصغيرة مغبرة شوي وغامقة، و السبب انو هادا الشهر الزيادة كان شهر تحميص، و هادا هو السبب الحقيقي انو البنت غامقة ما هي فاتحة لأبوها. مو متل ما قالت مرة أبوها الفهيمة (يبعتلها حمى ان شاء الله) إنها إجت غامقة لأنها طالعة لأمها. بقى لا تظلموها لليليا الأطرش المسكينة ما بيكفي انها ضلت حاطة البقجة على بطنها آخر 10 حلقات من هداك الجزء و أول 10 حلقات من هادا الجزء اللي فيها مكفيها حرام خطيّ . وتوتة توتة خلصت الحدوتة , حلوة و لا فتفوتة.. كه كه كه ...
رهف من حلب

16يوما

تحليل ودواء
دس الندل أبو غالب الملح الانكليزي في عجينات أبو بشير وحلّل أبو الحكم شخصية أبو غالب الحقيرة بأنه يحتاج إلى الزواج..

16يوما

متل معنا مع فريال
انشا الله بيحطوكِ على انجاصة وبيقوصوكِ برصاصة
(من دعوات فريال ضد شهيرة)!!

16يوما

مثقفون في الحارة
كفرنا السنة الماضية وقلنا ليش ما في بباب الحارة مثقفين، لأنو نزلوا لنا السنة كم واحد كومبارس حاملين كتب ومارقين.. رفع عتب يعني..

16يوما

يخلق من الشبه أربعين
العكيد أيمن رضا في باب الحارة يلاقي استنكاراً شعبياً بسبب مشاركته في أهل الراية بدور كرسون

لمناصرة قضية أبو عصام العادلة الرجاء إرسال أية معلومة تحصل عليها مهما كانت تافهة فربما تفيدنا في التحقيق عسى ولعل نراه يعود من الشهادة إلى النصر في المشهد الأول من الجزء الرابع، وإنا على دربك لسائرون lukmanderky@baladnaonline.comهذا البريد محمى من المتطفلين , تحتاج إلى تشغيل الجافا سكريبت لمشاهدته
الرجاء كتابة جملة (أبو عصام لن ننساك) على موضوع الرسالة، وبحياة الله تدعمونا بالاقتراحات والتفتيقات. لن ننساك
إثنين من أولاد أدو يأتوم إلى الحارة ويطالبون أبو حاتم بدين على صهره ولولا حلم الله كانو طلعو محملين من الحارة
أبو ابراهيم في ذمة الله صباح يوم


منقول من جريدة بلدنا