يا قلوبنا

يا قلوبنا اللي انسقت من دمع الحنين
الكان يكبر
كل ما خيالن مرق بالبال
ع حدود السهر
يضوّي قناديل الزمان
و تشعل الغابة مطر
و نتذكرن وقت كانوا هون
مزروعين بتراب العمر
موّال و حساسين
عنّة وتر مجنون
من شاعر قسوا حبابو
و قعد ينطر على دروب السفر
يا قلوبنا حلفتك بجرح الغياب
دقي على عناب البواب
و صرخي بوجه الزمان
يا زمان اسآل عنن خبرن
قصة هوانا
و كيف دوبنا القهر
و لمن زرعناه نبضة بدمنا
سقيناه من عنّة وتر آهات
زهّر ع الدراج و قلنا
يا ناطرين تصبرو
بكرا الصبح بعود و بتنسوا العذاب
و زيت الصبر نشف من قناديلنا
ما ضل بخوابي العمر شفة خمر
رمّد الجمر بمنقل الأحلام
و انحلّ الوتر
يا ناطرين تصبروا
و معقول ينفع الصبر
يا قلوب اللي كفّنها الضباب
و نبت فوق دروبها عشب الضجر
و شو ضل في عنّا هياكل عامرة
برعشة صلا
و بغفلة الأيام نركع نحرق البخور
قلبي مجمّرة
و انتو العبق بجوانحي
انتو الدفا اللي جايي من رنّة جرس
من مأذنة حلمي الهني
السهران ما بين السحاب
يا ناطرين تصبروا
و يا مشردين بهالدني
بعدو الدذلف ع بوابنا
عم ينقر و دمع الشتي
متسرب على دراج الملل
مجنون يا دمع الشتي
و دخلك بعد النا امان
هربت الأيام من صابيعنا
تخدر العمر الكان
ع وراق الورد مرسوم
بعيون الحكي مكتوب
بجنون العواطف رعب
معتّق خمر كرّام ما بينام
لو نام الجبان
يا ناطرين تصبروا
و يا مشردين بهالدني
بيكفي هجر
ارجعوا نشف زيت الصبر
ارجعوا تنعمل تحت
في القناطر مهرجان

منقول عن الشاعر انطون يعقوب .

يسلمو مرورة الك وللشاعر انطون يعقوب

اامانة اذا شفتيه نقليلو تحياتي