استفقاد ....

استفقاد ....


استفقدت ناطور الشتي
و خيام هالرعيان
قلّي بعيد رح يتجمّعوا
دوّرت ت داخ الزمان
مالقيت بكرا شي حدا احكي معو
غير الريح و عتمة الوديان ....

استفقدت صوتك مارق بالسّهل
صوب المنطرة
مالقيت غير الصدى
هونيك متعلّق بحبل القنطرة ....

استفقدت فيّ النبع
ودراج الحنين
دلبة الوادي
طيور كانوا ينزلوا
قلّي الشتي بكّير حتى يوصلوا
وهالنبع صارلو غايب من سنين ....

استفقدت كرم الندي
وكواخ كانوا هون جسر الفيّ
ما لقيت في غير الضّجر
وزغار مَ تدور ع نقطة ميّ ....

استفقدت هالشير البعيد
"رخامة البيضا"
بواشق الوديان
قالوا لي :
ما ضلّ من هاك الزمان
إلا طريق العين
طمروا الشوق و سواقي النهيد ....

استفقدت درب المدرسة
دعساتنا هونيك ع حجار الطريق
الشوق هالبيفور وقت بتدعسي
مالقيت غير النمل
ودياب ع صرخاتا بيشعل حريق ....

استفقدت "تنورين"
قلّي حدا :
راحت "نعيمة" من زمان
و ما بقي من الحلوين
غير دمعات الوداع
وغير ناطور السنين
وكان ياما كان ....

استفقدتك مبارح
لقيتك رايحة صوب السّهول
مشنشلي متل المطر
متل هالزمن ال بيدقّوا
عليه بالعرس النَّوَر
متل شي جوقة طبول
ما حدا بيعرف ليش صرت
هيك منيجرة قصب
ولا حدا بيذكر كيف
قبل الضوّ بيهجّوا العرب ....

استفقدت نهر الحلم
وسواقي العبير
بساتين ياقوت الفرح
غيمات علقانين بقواس القزح
مكسَر الفيّ و خيمة الورد الحرير
مالقيت غير سرير
من حجار زرقا بالنهر
قاعد ميصلّي العصر
وفي حدّ منّو جوقة عصافير ....

استفقدت مدري مين
مالقيت من عمر الدني
و من اترنا
هونيك عند مدارج الحلوين
غير الندي سهران "ع دراج الورد"
و الظن و التخمين ....

استفقدت حرش الندي
درب العاصفة
مزارع اللوز
و خيمتين زغار
مالقيت من عمر الحكي
إلا فرس و ع السرج خرج سرار ....

استفقدت درب المعصرة
دروة الدرب و عين هالمزراب
مالقيت إلا شقف سودا مكسّرة
من جرّة الفخار
وخيال حلوة ناطرة
شي بوستين زغار ....

استفقدت هالعرزال
هونيك بالجوزة معلّق متل شي خيال
لقيت الأسامي محفّرة بكعب الشجر
وقنديل نوّس قدّ ما حنّ السهر
وكوفيّة الخيّال
هلّي هج بليلة قهر لشمال ....

استفقدت بيّاع المواسم
قنطرة نهر العطش
و تلال خلف تلال
مالقيت غير الخوف قاعد عَ الدرب
عم يغزل بمغزال
وبلاد باعت شالها للديب
بردت جبهتا
وقعدت تحيِّك شال ....

استفقدت قنديل المسا
توت المصاطب
بيرق الأحلام
ميجنة جرن القمح
جاروشة الأيّام
مالقيت في غير السهر
سهران ما بينام ....


منقولة عن الشاعر أنطون يعقوب

مرمورة هيدا الديوان اللي عم تقريه؟؟؟؟


عكل الاحوال حلو كتير


وميرسي الك

حلوة ما ؟؟؟

اي كرمولة هاي من الديوان و الباقي كمان ما عدا "شوق"