حوار بين امرأة و زوجها

الزوج: مرحبا يا مرا… شو عاملتينا عشا اليوم؟


الزوجة: يه يه يه… تقبر عضامي… إجيت حبيبي؟!! تقبرني شو حركتك خفيفة وما بتزعج
حدا… لك حلّت البركة على أرض الديار يا روحي… طابختلك ويالنجي وكبة لبنية
تقبشني …


الزوج: يالله يالله بلا كتر غلبة، قومي حطي الأكل قومي


الزوجة: لك إي مو تكرم عينك ابن عمي… مو تكرم… لك من هالعين هَي قبل هَي

الزوج: ناموا الولاد؟


الزوجة من المطبخ: ناموا حبيبي ناموا على عشية، وحميتلّك الحمام يا عمري


الزوج بعد أن يرى أصناف المائدة أمامه: إيييييييييييييييييييييييه .. باين
السهرة رح تحلى اليوم


يمضغ اللقمة الأولى ويقول: ممممممممممممم طيبة هالكبة.. طيبة


الزوجة رافعة يديها للسماء: لك روح… ربي مولايي يبيضلك أيامك… ويبعد عنك
ولادين الحرام يا حق


ينهي الزوج طعامه قائلاً: الحمد لله


الزوجة: عجبك الأكل يا عمري


الزوج: إي والله… تسلم إيديكي… تعبتك معي


الزوجة مرتبكة من الفرح: عجبك الأكل؟؟!… لك تطلع على قبري شو إنّك هني وبتعرف
تحكي… لك تكفنّي بإيديك على هالكلام الحلو يا حق.. بكرة بدي أعملّك محشي وبطاطا
بالفرن إي بدك تاكل صابيعك وراهن… بعدين شو تعبتني وما تعبتني؟!… ليش أنا عندي
غيرك بالدنيا يا حبيبي؟!!، لك تشكل آسي ياحق

الزوج وهو ينشّف يديه بعد غسلها: جاهز الحمام يا مرة ؟؟


الزوجة بخجل… وبابتسامتها الحلوة : ولَو تقبشني… ولَو!!! وحطيتيلك صابونة غار
من يللي جابتهم أمك تقبرني


ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــ

*وإليكم هذا الحوار بين إمرأة اليوم وزوجها *



الزوج: مرحبا يا حلوة… شو عاملتينا عشا اليوم؟


الزوجة متلقحة على الكنبة وبيدها جريدة: شو إيمتى جيت؟؟ مبكّر مو على عادتك
يعني… على كلٍ عملتلك مجدرة برغل وعدس… شو بدي أطبخلك يعني؟! مو مبارح أكلت
لحمة بالصينية؟؟


الزوج: يا الله تقبشيني، قومي حطيلنا الأكل لناكل


الزوجة: ليكو الأكل عندك بالمطبخ… وين بدو يروح يعني؟؟!! كمان بدي جبلك الأكل
لحد عندك؟


الزوج باتجاهه إلى المطبخ: ناموا الولاد على حد علمك؟


الزوجة: إي شو نيّمهم هلق وبكرة عندهم عطلة؟؟؟


الزوج يحدث نفسه من المطبخ: العمى شو هالمجدرة؟؟


يمضغ اللقمة الأولى ويقول: إي والله كأني عم آكل بحص مو برغل


الزوجة : شو عم تبَروِت يا رجال؟؟


ينهي الزوج طعامه قائلاً: آ…؟؟ مو شي حبيبتي… مو شي


الزوجة: عجبك الأكل؟


الزوج بإحباط: إي طبعاً طبعاً… تسلم إيديكي

الزوجة بتأفف: معناها كل يوم بعملك منها إذا حبيت


الزوج وهو ينشّف يديه: جاهز الحمام يا ترى؟؟


الزوجة ترمي الجريدة أرضاً صارخة في وجهه: العمى على هالقصة… طبختي يا مرا؟
ناموا الولاد يامرا؟…جاهز الحمام يا مرا؟… إي شو أنا ما عندي شغل
غيرك؟؟؟ ورصاص


*** H E L L B O Y ***

والله يجوز الوجهان

بس أنتي مؤيدة لأي طرف ... و بكل جدية ؟
يعني بدي رأيك ...
و ميرسي على كل حال