لقمان ديركي : حديث عائلي من طرف واحد

مشان الله يا ابني لا تواخذني على هالمستشفى اللي ولدتك فيها، صحيح أنها فوضى بفوضى ، والفايت فايت والطالع طالع ، وصحيح أنو ممكن يكون شي حدا نسي شي ببطني وهنن عم بيولدوك ، بس احمد ربك أنو ما نسيوك ألك شخصياً ، بعرف أنو رح تنزعج مني وأنت وعم بتشوف الممرضات نسيانينك وقاعدين عم يطقوا حنك

فوق راسك وراس زملاءك الرضع ، بس شو بدك تعمل مو أحسن ما يتركوك ويروحوا على شي مشوار ، كمان بعرف أنك عم تتضايق لأنو انبح صوتكم أنت وزملاءك الرضع وأنتو عم بتصرخوا بدون ما حدا يسمعكم أو يجيب لكم حليب أو دوا، بس هادا ألو فوائد لأنك رح تكبر وأنت متعلم عالصراخ والجعير ، وهي شغلة ما بيعرفوها الببويات بالمستشفيات التانية ، كمان بعرف أنك أحياناً بتجوع وأحياناً بتعطش وأنو ما حدا عم ينتبه لك ، بس صدقني بغير مستشفيات عم يجوعوا على طول مو بس أحياناً متلك، أنا بعرف من شو زعلان ، يمكن لأنو الممرضات ما عم يخلوك تحكي لأنو هنن مو متعودات على ببو عم يحكي ، بهي الحق عليك كان لازم تفهمهن أنك بتعرف تحكي، وبس يفهموا أنك بتعرف تحكي رح يخلوك تحكي صدقني، هلأ بيجوز تحكي لحالك ويقعدوا يفصفصوا بزر ويتفرجوا على شي مسلسل ، أنت لا تهتم .. المهم الببويات رفقاتك يسمعوك ، هلأ بيجوز تقلي أنو الببويات ما عم يفهموا عليك ، ساعتها ارتاح أنت ولا تلوم حالك .. هي مشكلتهم مو مشكلتك، لا تزعل مني يا ابني وتقلي أنو كان ممكن أولدك بمستشفى تاني أرقى وأحسن، بس والله لقيتها كبيرة علي أني اترك المستشفى اللي ولدت فيه كل أخواتك وروح على مستشفى غريب، بعدين شو بدهن يقولوا أخواتك عني ، خجلانة مننا ومن المستشفى اللي ولدنا فيه ؟!.. هلأ ما عاد يعجبِك وصار زغير بعينيك يا ماما؟!!!!!!!!!!!!!!!!!!!!!!!!!!
بقى قوم واطلع من الحاضنة تبعك وحاج تعمل لي حردان وزعلان ، قوم اشتغل لك شغلة ، نضّف حواليك بالأول، وجرّب تمشي، وافتل بالمستشفى كلها ، وإذا ما حدا من رفقاتك رضي يقوم معك، قوم لحالك وشوف شو لازمهن وساعدهم بلكي بيقوموا وبيساعدوك وبينضفوا معك المستشفى كله مو بس حواليهن وحواليك .. ما شالله حولك وحواليك.. ذكي وحلو وبتجنن ، بس عم تنتظر الممرضات يعملوا كل شي بدالك، حتى أنك بتسمع موسيقا على ذوقهن، وبتتفرج عالمسلسلات اللي عم يتفرجوا عليها، جرب اقلب القناة لحالك، جرب حط شريط موسيقى لحالك، أحسن ما تفكر بمستشفى تاني، بيضل هاد المستشفى مسقط راسك، وبيضلوا الببويات اللي بالحاضنات رفقاتك.